(Picture: Courtesy of Google Images)
నీరవ నిశీధివేళ కన్నీరు విడువ
నేల యని ననుమీరు ప్రశ్నింపవలదు
బాధ కాదిది; ఒక యోగ సాధనమ్ము!
క్షణములో దివిని చేరు లక్షణము నాది 1
***
పాదరస బిందువులవంటి బాష్పములను
విడుచు చుంటివి నెచ్చెలీ! విఫలమైన
స్వాప్నిక ప్రేమ మృదుల సంస్పర్శ వలన
పులకరించెనె మేను? చెప్పుము లతాంగి! 2
***
ముకురమును బోలు ఆకాశమున అనేక
చిత్రముల గీసి పెట్టెనె చెప్పకుండ;
వేకువనె లేచి తొలిసంధ్య వెలుగులోన
కాంచితిని; ఓహొ! ఆ చిత్రకారుడెవడొ!! 3
***
అలిగి ఆకాశమున కేగు పులుగులన్ని
బుజ్జగింపగ వచ్చెనీ భూమిపైకి;
ముచ్చటగ చూచు నక్షత్రముల నదల్చ
దూరతీరాల కెచటికో పారిపోయె! 4
***
బొమ్మలా కాదు ఇవి మన భూమి పైన
కల విచిత్రములన్నియు కలసివచ్చి
కూరుచున్నవి ఎవ్వరి కోరికలకు
ప్రతిఫలమ్ములొ నేను చెప్పను సుమండి 5
***
కాలధర్మము చెందిన కవులు చెప్పు
కథలు వినుచుంటిమాయె ఉత్కంఠ తోడ
నీవు పోయిన వెన్క అన్నియును సున్న
అనుకొనకు పద్యమన్నది అమృతగుళిక 6
***
లేదు నా కోర్కె తీరనేలేదు; మంచి
మానవుల చూడ ఈ రాజధాని వచ్చి
విసిగుచెందితి; ఈ రాతి విగ్రహములు
మాటలాడవు; ఇసుమంత చోటునీవు! 7
***
పాడినదె పాట; ఇక మాటలాడనేమి
మిగులు దిన, వార, పక్ష సమ్మేళనముల!
దంచినదె దంచి, దక్కినదంత బొక్కి
తిరిగి వెదకుము; కొత్త తద్దినము కొరకు!! 8
***
ఎత్తిపోతల పధకము నెవరు మొదలు
పెట్టిరో గాని అది ప్రతి పట్టణమున
అమలు జరుగుచు తిరిగి ముమ్మరము సేయ
లబ్ధిదారులు వేలును లక్షలైరి 9
***
పిచ్చివాడను నామము వచ్చెనేమి
ఇచ్చవచ్చినయట్లు వర్తింపవచ్చు
కాకపోయిన ఈ పాడు లోకమునకు
నమ్మకము కల్గ దెంత వైనముగ జెప్ప 10
***
ఎప్పుడో ఎక్కడో మరి తప్పకుండ
తలచుకొను నిన్ను మంచి పద్యమ్ము తగుల
తెలిసికొను తాత పేరు తద్దినము నాడు
కాని నీ పేరు అతగాని కంఠ గతము 11
***
